Exo 24 | ZomZIV | STEP | Tua ciangin amah in Moses kiangah, “Nang le Aaron, Nadab le Abihu le Israel upate sawmsagih TOPA kiangah hong paito un. Note in a gamla sim panin na bia ding uh a,

Exodus 24

Thukhun Kikipsak

1 Tua ciangin amah in Moses kiangah, “Nang le Aaron, Nadab le Abihu le Israel upate sawmsagih TOPA kiangah hong paito un. Note in a gamla sim panin na bia ding uh a, 2 ahi hangin Moses bek in TOPA a naih ding hi; adangte a nai-ah nong pai peuhmah kei ding uh hi. Mipite in amah a zui thei kei ding uh hi,” a ci hi. ^a

3 Moses pai-a TOPA kammalte le ngeinate khempeuh mipite tungah a gen ciangin amaute in aw khatin, “TOPA gen khempeuh ka hih ding uh hi,” ci-in a dawng uh hi. 4 Tua ciangin Moses in TOPA gensa khempeuh a gelh hi. ^b

Amah a zing ciang zingsangin tho baih a, mual bulah biakna-tau khat dawhin Israel nam sawm le nihte tangin suang sawm le nih a phut hi. 5 Tua ciangin Israel khangnote sawla, amaute in meihal biaknate pia uh a, TOPA tungah kilawmtakna biakna-in ^{▼▼24.5 Tang ngeina in kilemna biakna} bawngtalnote a pia uh hi. 6 Moses in sisan alang la-in kuangkum sungah koih-a, alang pen biakna-tau tungah a theh hi. 7 Tua ciangin Thukhun Laibu la-in mipite tungah a sim hi. Amaute in, “TOPA gensa khempeuh ka hih ding uh hi; a thu ka mang ding uh hi,” ci-in a dawng khawm uh hi. ^d

8 Tua ciangin Moses in sisan la a, mipite tungah theh in, “Hih in, TOPA in hih thute tawh kizui-in note tawh thukhun a bawlna sisan ahi hi,” a ci hi.

9 Moses le Aaron, Nadab le Abihu le Israel upa sawm sagihte pai to uh a, 10 Israel-te Pasian a mu uh hi. A khepek nuai-ah Sapphire ^{▼▼24.10 Ahikeh lapis lazuli} tawh kibawl, van banga siang suangphah a om hi. 11 Ahi hangin Pasian in hih Israel mi makaite tungah a khut a liik kei hi; amaute in Pasian mu uh a, amaute in a ne a dawn uh hi.

12 TOPA in Moses kiangah, “Mualtung kei kiangah hong paito inla hih lai-ah na ngak in; amaute lamlah nadinga ka gelhsa thukham le thupiakte kigelhna suangpekte kong pia ding hi,” a ci hi. ^f

13 Tua ciangin Moses in amah a huhpa Joshua kizuisak a, Pasian’ mualtungah Moses a kahto hi. 14 Amah in upate kiangah, “No kianga kong ciah matengun kote na ngak un. Aaron le Hur note tawh om khawm hi, kitotna thusia a nei peuhmah amaute kiangah na pai un,” a ci hi. ^g

15 Mual tungah Moses a paitoh ciangin tua mun meii in tuama, 16 Sinai Vum tungah TOPA minthanna a kinga hi. Meii in niguk sung mual tuama a ni sagihna ciangin TOPA in meii lak panin Moses a sam hi. 17 Israel-te tunga TOPA minthanna mual tungah a kangtum mei tawh kibang hi. 18 Tua ciangin Moses mual tungah a pai kawmkawmin meii lakah a lut hi. Tuaci-in mual tungah sun sawm li le zan sawm li a tam hi. ^h